ინდური ცეკვის შესწავლის მსურველებმა დაგვიკავშირდით
ტელეფონის ნომერზე:
2 29 24 58

понедельник, 29 марта 2010 г.

სმიტა პატილი - ადრე შეწყვეტილი სიცოცხლე

დელის კინოფესტივალების სარეკლამო აფიშებზე ხშირად დაინახავდით ამ სახეს ჭკვიანი, ყურადღებიანი თვალებით და სადა, მოკრძალებული ვარცხნილობით.
მსახიობ სმიტა პატილის სახე - ასე ცნობილი და საყვარელი სხვადასხვა ქვეყნის მაყურებელთათვის მრავალი ფილმიდან.
სამწუხაროდ მის ნიჭს აღიარება მხოლოდ სიკვდილის შემდეგ ხვდა წილად. მსახიობი მოულოდნელად 1986 წლის 13 დეკემბერს, 31 წლის ასაკში გარდაიცვალა.
ხელოვნებაში მისი ბედი იყო ბედნიერი, გზა კინემატოგრაფში - სწორი და პატიოსანი, აღიარება - დამსახურებული.
სმიტა დაიბადა 1955 წლის 17 ოქტომბერს
მისი კარიერა დაიწყო ტელევიზიაში, სადაც 17 წლის სტუდენტი მიიწვიეს დიქტორად სამუშაოდ.
-არ ვფიქრობ რომ ტელევიზიაში მივიღე მსახიობის პროფესიისათვის სასარგებლო
რაიმე გამოცდილება - თქვა მსახიობმა ტაშკენტის კინოფესტივალზე მიცემულ ერთ-ერთ ინტერვიუში 1978 წელს, - დიქტორს სრულიად სხვა ამოცანა აქვს. საჭიროა უბრალოდ წაიკითხოს ტექსტი, იმუშაოს კამერაზე, რაც კინოში არ გამოგადგება, თუმცა ტელევიზია გაძლევს პოპულარობას. შენ ყოველდღე გხედავენ, გცნობენ. მე შემამჩნიეს კინემატოგრაფისტებმა და მივიღე რამდენიმე წინადადება კომერციულ კინოში, თუმცა მე ეს არ მაინტერესებდა და უარს ვამბობდი.
პირველად ეკრანზე სტუდენტ არუნა კჰოპკარის სადიპლომო ნამუშევარში გამოჩნდა. სწორედ ამ ფილმში შეამჩნია ის შიიამ ბენეგალამ და შესთავაზა მონაწილეობა საბავშვო ფილმში, ამას კი მოჰყვა ფილმი "ღამის დასასრული", სადაც სმიტამ ერთ-ერთი მემამულის ცოლის, რუკმინის როლი შეასრულა. ძმებმა მემამულეებმა მოიტაცეს გათხოვილი ქალი და აქციეს ტავიანთ ტყვედ. რუკმინი ყოველივე ამას უსიტყვო ბედისადმი მორჩილებით ხვდება. შინაგანი ზიზღით მის თვალწინ მომხდარისადმი და ეჭვიანობით ქალისადმი, რომელმაც მისი ქმრის გულში ადგილი დაიკავა. არა მარტო ის ქალი არის მსხვერპლი, არამედ თავად რუკმინიც საკუთარ სახლში ტყვედქცეული.
ამ როლმა გადაწყვიტა სმიტა პატილის ბედი და სამუდამოდ დააკავშირა ის კინემატოგრაფსა და შიიამ ბენეგალას, რომელმაც შემდგომ ფილმებშიც გადაიღო სმიტა.
ერთ-ერთი ასეთი ფილმი იყო: "რთული როლი", სადაც სმიტამ კინემატოგრაფის ვარსკვლავის, უშას როლი ითამაშა, რომლის წარმატებული კარიერის უკან იდგა წარუმატებელი პირადი ცხოვრება, ქმარი რომელსაც თითონ კი არა მისი ფული უნდოდა. მსახიობმა 40-50-ანი წლები ინდური კინოს ვარსკვლავის ჰანსა ვადკარის ბიოგრაფია განასახიერა, თუმცა საკუთარი თავიც გამოსახა.
ბოლოსდაბოლოს სმიტას ცხოვრებაში დადგა მომენტი რომელზეც ის ყოველთვის ოცნებობდა. ამ მომენტს ის სულიერად და ფიზიკურად მომზადებული შეხვდა.
სმიტა ფეხმძიმედაა.
პირველად ცხოვრების მანძილზე სმიტამ წონაში მოიმატა. ძლივს დადის, რაჯ ბაბარის სიტყვებით რომ ვთქვათ "ქანაობს როგორც იხვი". რაჯი ბედნიერია და ოჯახში საერთო მხიარულებაა.
-ეს მშვენიერი გრძნობაა, ფეხმძიმობის დასაწყისში მე ძალიან ვღელავდი. ახლა ვცდილობ ყველაფერი სწორად წავიდეს - თქვა მსახიობმა.
რაჯისა და სმიტას არაფერი მოუმზადებიათ ბავშვისათვის წინასწარ. ახალ სახლში სადაც ბავშვის დაბადებამდე გადავლენ საბავშვო ოთახიც კი არ მოუმზადებიათ.
ისინი უკვე ხუთი წელია ერთად არიან თუმცა ისევ ისე უყვართ ერთმანეთი. ეს კარგად ჩანს მათი საუბრებიდან:
-ჩემთვის სულერთია, მაგრამ რაჯს ვაჟი ურჩევნია - ამბობს სმიტა მომავალი შვილის შესახებ.
-ვაჟთან ადვილია ურთიერთობა, მაგრამ გოგონას ძალიან ფაქიზად უნდა მოპყრობა - ახსნას პოულობს რაჯი.
-ჩვენ გვჯერა ბედისწერის და არ ვგეგმავთ მომავალ შვილს.
ფეხმძიმობის გამო სმიტას გადაღებები შეჩერდა.
დადგა დღეც როცა პატარა მოევლინა სამყაროს. საავადმყოფო სადაც სმიტა პატილი და ასევე ცნობილი მსახიობი რატი აგნიხოტრი თითქმის ერთდროულად მოათავსეს, საყოველთაო ინტერესის საგანი გახდა. სმიტამ ერთი დღით დაასწრო რატის და მშვენიერი ვაჟი მოავლინა სამყაროს, მეორე დღეს კი რატის გულშემატკივრობდა.
პალატაში სადაც სმიტა წევს, ოჯახის წევრების გარდა არავის უშვებენ. არა იმიტომ რომ რაიმე გართულებაა, არამედ იმიტომ რომ ტრადიციაა რაჯის ოჯახის, რომ დედა-შვილი 40 დღის განმავლობაში იზოლირებული უნდა იყოს. პატარა თავს კარგად გრძნობს.
-ჩვენ მას პრატეიკი დავარქვით - ამბობს ამაყი მამა.
მსახიობმა თავად აირჩია წითელი ოქროსფერებით გაწყობილი სარი განსაკუთრებული შემთხვევებისათვის. ის ოცნებობდა განსაკუთრებულ ფორმაში ყოფილიყო როცა ახალ ბინაში გადავიდოდა მეუღლესთან და შვილთან ერთად.
ახალ ბინაში გადასვლა ახალი ეტაპის დასაწყისი იქნებოდა მის ცხოვრებაში და სმიტა მოუთმენლად ელოდა ამ დღეს.
სმიტამ მართლაც ჩაიცვა ეს სარი და მართლაც მშვენივრად გამოიყურებოდა როცა მიემგზავრებოდა სხვა სამყაროში სამოგზაუროდ, ოღონდ რაჯისა და პატარას გარეშე, რომელის მხოლოდ 15 დღისა იყო.
სმიტა პატილმა 12 დეკემბერს იგრძნო თავი შეუძლოდ, სწორედ იმ დღეს როცა მეუღლეს შოუზე უნდა გაჰყოლოდა თან. ამ დღეს დიდი ხანი ელოდა რაჯიცა და კინოინდუსტრიაც.
სმიტა არწმუნებდა მეუღლეს წასულიყო მის გარეშე, მაგრამ ხედავდა რა რაჯი ტემპერატურა მატულობდა გადაწყვიტა მეუღლესთან დარჩენილიყო.
როცა მსახიობი საავადმყოფოში მოათავსეს ის უკვე კომაში იყო. დაეწყო სისხლდენა ცხვირ-პირიდან. მაღალი ტემპერატურის ქვეშ 5 დღის განმავლობაში იმყოფებოდა ციებ-ცხელების მდგომარეობაში.
ცნობა სმიტა პატილის კრიტიკული მდგომარეობის შესახებ სწრაფად გავრცელდა ბომბეიში და საავადმყოფოს ფოიე სწრაფადვე გაივსო ხალხით, მსურველებით მიეცათ თავისი სისხლი მსახიობისათვის. ყველა უსიტყვოდ ლოცულობდა იმ იმედით რომ სმიტა გაუმკლავდებოდა მდგომარეობას, ისევე როგორც გაუმკლავდა ანალოგიურ კრიტიკულ სიტუაციას ამიტაბჰ ბაჩანი.
ის ხომ ჯერ მხოლოდ 31 წლის იყო და ის-ის იყო მიიღო ის, რაზეც ასე ოცნებობდა, რაჯი და მათი საერთო შვილი. ნუთუ ღმერთი ამ ყველაფერს წაართმევდა?
თუმცა ასეც მოხდა. კვირას, 13 დეკემბერს სმიტა გარდაიცვალა.
ეს უდიდესი შოკი იყო კინოინდუსტრიისათვის. თავად სმიტას ოჯახსა და რაჯს რაც შეეხება, მიუხედავად ძლიერი დამამშვიდებელი საშუალებებისა რაჯი დაკრძალვის ცერემონიალზე სრულიად განადგურებული იყო. მზრუნველობით უსწორებდა სარის სმიტას და როცა მას წმინდა სითხე აპკურეს, რაჯიმ არავის მისცა ნება შეხებოდა მის ცხედარს და თავად საკუთარი ხელებით მოწმინდა სახე.
იმავე ხელებით აანთო კოცონიც.
- ეს ყველაზე საშინელი სასჯელია - ტიროდა პუნამ დჰილონი, - ხედავდე იწვოდეს ადამიანი რომელიც გიყვარს, რომელსაც ეხვეოდი, რომელთანაც გაატარე შენი ცხოვრების საუკეთესო დრო. არვიცი როგორ იცხოვრებს რაჯი სმიტას გარეშე... არვიცი როგორ ვიცხოვრებთ ყველანი მის გარეშე...

воскресенье, 28 марта 2010 г.

"HOUSEFULL" - რეჟისორ საჯიდ ქჰანის ახალი ფილმი


ფილმის "HOUSEFULL" გადაღება თვეების განმავლობაში მიმდიანარეობდა ლონდონსა და იტალიაში. ფილმის მიმართ ძალიან დიდია ინტერესი და მოლოდინი, რამდენადაც მასში უამრავი ცნობილი ვარსკვლავია დაკავებული: აქშაი კუმარი, დიპიკა პადუკონი, ლარა დატა, რიტეშ დეშმუქჰი, არჯუნ რამპალი, ჯია ქჰანი, რანდჰირ კაპური.
ფილმი ეხება ჭეშმარიტი სიყვარულის ძიებას, იმას თუ როგორ შეიძლება რომ ერთმა ტყუილმა მიგვიყვანოს მეორესთან. საზოგადოების სხვადასხვა ფენის სხვადასხვა ადამიანებს, გაერთიანებულებს კიდევ უფრო მეტი არეულობა შეაქვთ ამ საერთო ქაოსში.

ჩემი აზრით სასიამოვნო საყურებელი კომედია იქნება, მითუმეტეს თუ გავითვალისწინებთ რომ სიყვარულზე ფილმები ძალიან მოგვენატრა.

суббота, 27 марта 2010 г.

უდეი ჩოპრა თავისი ახალი ფილმის გამო განიცდის

ცნობილი იაშ ჩოპრას ვაჟი, უდეი ჩოპრა სავსეა შემოქმედებითი ძალებითა და ამბიციებით. ცნობილი წარმატებული კომედიური როლების შემდეგ ბლოგბასტერებში - "ბაიკერები" და "ბაიკერები 2", უდეიმ შეყვარებული გმირის კარიერაზეც იფიქრა. მან თითონვე დაწერა სცენარი, დააფინანსა და გაუწია პროდიუსერობა ფილმს - "სიყვარული შეუძლებელია", რომელშიც მთავარ როლზე მასთან ერთად პრიანკა ჩოპრა მოიწვია.
ფილმი ამ წლის დასაწყისში გამოვიდა ეკრანებზე და კრიტიკებისა და მაყურებლისაგან ცივად იქნა მიღებული და ცხადია არც შემოსავლიანი გამოდგა.
უდეიმ რათქმაუნდა ფილმის ჩავარდნა ძალიან ახლოს მიიტანა გულთან.
ის ერთი თვით ამერიკაშიც კი გაემგზავრა როგორც ამბობენ, ჭრილობების მოსაშუშებლად, თუმცა არც იქედან დაბრუნებული ჩანს ბედნიერი.
ბრძენმა და გამოცდილების მქონე ადამიანებმა იციან როგორ გადაიტანონ ასეთი მარცხი და დანაკარგები.
იმედს ვიტოვებთ ბოლივუდის ყველაზე მსხვილი კინომწარმოებლის შვილი საკმარისად ძლიერი აღმოჩნდება იმისათვის რომ არ დანებდეს და მომავალში უფრო სწორად შეარჩიოს პროექტები, რომლებშიც თავისი ნიჭის საუკეთესო მხარეებს აჩვენებს. ეს კი კომედიური ხასიათის როლებია.
თუ კადრებით ვიმსჯელებთ ფილმი ნამდვილად მხიარული და საინტერესო ჩანს.

пятница, 26 марта 2010 г.

ბ-ნ დავით ბეჟიტაშვილის მიმართვა ინდური კინოს მოყვარულებისადმი

ჩემო ძვირფასებო!
მერწმუნეთ ძალიან განვიცდი როდესაც ამ სიტყვებს გწერთ, მაგრამ რეალობა ასეთია:
3 აპრილიდან გარკვეული პერიოდით ტ/კ "კავკასიას" ეთერში აღარ გავა ინდური ფილმები, ხოლო მაღაზია "პლანეტა ბოლივუდი" იცვლის პროფილს და მხოლოდ სახლში მიტანით მოემსახურება ერთგულ მაყურებელს.
კ/თ "ახმეტელი", ანსამბლი "სიტარა", ტელეკომპანიები: "ევრიკა" და "კავკასია,", მაღაზია "პლანეტა ბოლივუდი"... რამდენი სიამოვნება და სიხარული გვახსოვს იმ დღეების...
ნოსტალგია დიდია, მაგრამ დრო მიდის და აუცილებელია აუწყო ფეხი და არ ჩამორჩე. 14 წელზე მეტია ჩვენ ერთად მოვდივართ და დღემდე მოგვიყვანა ინდოეთისადმი თითოეული ჩვენგანის უსაზღვრო სიყვარულმა. ამ ფონზე ამ გადაწყვეტილებების მიღება არ იყო იოლი. მიზეზები უამრავია და ახლა ჩამოთვლით თავს არ შეგაწყენთ.
ბოლო დროს ჩვენი მაყურებელი მოაკლდა კინოთეატრს და მაღაზიას.
ჩემი, ნინოს და ჩვენი მეგობრების უამრავი მცდელობის მიუხედავად სურათი არ იცვლებოდა.
XXI -ე საუკუნის მიღწევამ - ინტერნეტმა ამ ეტაპზე მთელ მსოფლიოში დიდი დარტყმა მიაყენა კინოინდუსტრიას. ამას თუ დავუმატებთ ჩვენი მოსახლეობის მძიმე ეკონომიკურ მდგომარეობას, მაშინ ყველაფერი ნათელი გახდება.
მე მესმის თქვენი... იმედია თქვენც გამიგებთ... თუმცა ამით არ მთავრდება ყველაფერი. პირიქით უამრავი საინტერესო გეგმები გვაქვს და დარწმუნებული ვარ თქვენი თანადგომით კვლავ ყველაფერი კარგად იქნება.
გეგმები მრავალფეროვანია:
ამ ზაფხულს, საქართველოში გადავიღებთ პირველ ინდურ-ქართულ ფილმს, რომელიც ინდოეთის და საქართველოს ეკრანებზე ერთდროულად გამოვა და რომელშიც რამდენიმე თქვენი საყვარელი ინდოელი მსახიობი მიიღებს მონაწილეობას. (ვინაობას ჯერ-ჯერობით არ ვასახელებ). მოსამზადებელი სამუშაოები უკვე დაწყებულია.
აგრეთვე თვეში ორჯერ სხვადასხვა დარბაზებში მოეწყობა ინდური საღამოები, რომლებიც იქნება მყარი გარანტია იმისა რომ ჩვენ ერთმანეთს არ დავკარგავთ. "პლანეტა ბოლივუდი" თვეში ორჯერ, სახლში მიტანით შემოგთავაზებთ ბოლივუდის საუკეთესო ჰიტებს. მალე ამუშავდება ინტერნეტ-ტელევიზია "პლანეტა ბოლივუდი", რომელიც ყოველდღიური ურთიერთობის საშუალებას მოგვცემს. მაისის ბოლოს კი ინდოეთის მთავრობის დახმარებით თბილისში გაიმართება ინდური ფილმების კინოფესტივალი.
როგორც ხედავთ გეგმები უამრავია, თუმცა მათი განხორციელების ერთადერთი გარანტია არის თქვენი გვერდში დგომა და აქტიურობა, რომელიც უნდა გამოხატოთ ჩვენი საიტის ხშირი სტუმრობით და თქვენი მოსაზრებებისა და კომენტარების დატოვებით, ჩვენს ჯგუფებსა და ფორუმებში გამოხმაურებით. მგონი ძალიან ბევრს არ გთხოვთ.
მე თქვენ ყველას გიცნობთ და პერსონალურად გიხდით მადლობას გვერდში დგომისათვის როგორც წარსულში, ასევე მომავალში.
მე თქვენთვის არასოდეს მიღალატია და არც მომავალში გიღალატებთ. პირიქით, უამრავ სიხარულს და სიამოვნებას გპირდებით, ოღონდ მომეცით ძალა და ზურგი გამიმაგრეთ.
მე ყოველთვის ყურადღებით ვკითხულობ თქვენს კომენტარებს. ამ წერილზეც ძალიან საინტერესო იქნება თქვენი მოსაზრებები.
განსაკუთრებული მადლობა კი, ნინო კრავეიშვილს, რომლის უანგარო და ფასდაუდებელი შრომის შედეგია, რომ ჩვენი საიტი და ჯგუფები საინტერესო და მრავალფეროვანია.
უდიდესი პატივისცემით, მადლიერებით და სიყვარულით, მუდამ თქვენი - დავით ბეჟიტაშვილი

четверг, 25 марта 2010 г.

კატრინა და რანბირი ინდოეთის ქალაქებს ერთად მოივლიან

აპრილის თვეში კატრინა კეიფი და რანბირ კაპური აპირებენ მოგზაურობას ინდოეთის ქალაქებში. ეს მოგზაურობა დაკავშირებული იქნება რეჟისორ პრაკაშ ჯჰას ახალი ფილმის "Raajneeti"-ს რეკლამირებასთან.
რამდენადაც ფილმი პოლიტიკური თრილერია რანბირი და კატრინა სხვადასხვა ქალაქებში კოლეჯებსაც ესტუმრებიან და ჩაატარებენ დისკუსიებს სტუდენტებთან პოლიტიკურ საკითხებზე. ცნობილი გახდა რომ კატრინა უკვე დაინტერესებულია მიმდინარე პოლიტიკური საკითხებით. რანბირი კი თავს გაცილებით თავდაჯერებულად გრძნობს და სურს ექსპრომტად ისაუბროს.
კადრები ფილმიდან

კატრინა კეიფი 2010 წელს მნიშვნელოვნად მიიჩნევს

კატრინა კეიფს სულ ახლახან ჯანმრთელობასთან დაკავშირებული პრობლემები ჰქონდა.
საკვების მიერ მიღებული მოწამვლის შემდეგ მას მოულოდნელად გული წაუვიდა. რაც გამოწვეული იყო გამოფიტვით.
თუმცა მსახიობს სხვა პრობლემები უფრო აწუხებს. ის შეწუხებულია იმ უარყოფითი აურით, რაც მის ირგვლივ შეიქმნა და ამის ძირითად მიზეზად მსახიობი პრესასა და ტელევიზიას მიიჩნევს.
ჭორები მისსა და რანბირ კაპურს შორის სავარაუდო რომანის შესახებ, ასევე ჭორი მის თითქოსდა სწრაფვაზე შაჰრუჰ ქჰანის მიმართ აშკარად უარყოფითად მოქმედებენ მსახიობის ჯანმრთელობაზე.
-ძალიან დიდი უარყოფითი ზეგავლენაა ირგვლივ და ეს მოქმედებს ჩემზე - განაცხადა მსახიობმა.
თუმცა კატრინას გადაწყვეტილი აქვს გაწონასწორდეს თავის სამუშაოზე, რადგან თვლის რომ 2010 წელი ერთ-ერთი ყველაზე მნიშვნელოვანი იქნება მის კარიერაში. ამ წლისათვის ის განწყობილია რომ ისევ მოიპოვებს კრიტიკებისა და თავისი მაყურებლის პატივისცემას მსახიობური თამაშითა და გარეგნობით.

вторник, 23 марта 2010 г.

კარან ჯოჰარი "მეგობრები" - ს გაგრძელებას შემოგვთავაზებს

ყველასათვის საყვარელი რეჟისორი, კარან ჯოჰარი თავს დასვენების უფლებას არ აძლევს. "ჩემი სახელია ქჰანი" -ს წარმატებული მსოფლიო პრემიერის შემდეგ, ის მზადაა მაყურებელს თავისი კინოკომპანიის "Dharma Productions"- ს სახელით რამდენიმე პროდიუსერული პროექტი წარუდგინოს.
პირველი ესაა ფილმ "დედინაცვალი"-ს რიმეიკი, რომელშიც ჯულია როტბერსი და სუზან სარანდონი თამაშობენ, კაჯოლის, კარინა კაპურის და არჯუნ რამპალის მონაწილეობით.
მეორე ანიმაციური ვერსია თავისი სადებიუტო ნამუშევრისა , "ცხოვრებაში ყველაფერი ხდება", შაჰრუჰ ქჰანის, რანი მუქერჯისა და კაჯოლის გახმოვანებით.
მესამე ესაა ფილმი "ვერ ვიტან სიყვარულის ისტორიებს", სონამ კაპურისა და იმრან ქჰანის მონაწილეობით, რომლის მუსიკალური ნომრების გადაღებაც ახლახან დასრულდა.
მეოთხე, გაგრძელება კომედიისა "მეგობრები". მთავარ როლებში ისევ ჯონ აბრაჰამი და აბიშეკ ბაჩანი. ქალის მთავარ როლზე ჯერ არავინაა დამტკიცებული.

воскресенье, 21 марта 2010 г.

შაჰიდ კაპური - საყვარელი ბიჭუნა "პეპსის" რეკლამიდან

23 მარტიდან მაღაზია "პლანეტა ბოლივუდი" გვთავაზობს ფილმს - "გული გეუბნება ითამაშე", რომელშიც მთავარ როლს რანი მუქერჯისთან ერთად შაჰიდ კაპურიც თამაშობს.
ვერავინ იფიქრებდა წლების წინ რომ ეს საყვარელი ბიჭუნა ცნობილი "პეპსის" რეკლამიდან ასე მოაჯადოებდა საზოგადოებას.

მან განიცადა მეტამორფოზა საყვარელი ბიჭიდან - ყოვლისშემძლე, კვალიფიცირებულ მსახიობობამდე. ეს არამარტო გარეგნობას, არამედ მის მსახიობურ მონაცემებს და ფილმებში საცეკვაო ნომრებსაც ეხება.
"კადრები ფილმიდან გული გეუბნება ითამაშე"
გთავაზობთ ინტერვიუს მსახიობთან.
-ბავშვობისას ვინ გინდოდათ გამხდარიყავით?
-ეს უცნაურია, მაგრამ მე ნამდვილად არ ვიცოდი ვინ მინდოდა გავმხდარიყავი. მოზარდობამდე მე ვიყავი საკმაოდ მერყევი და საკუთარ თავში ნაკლებად დარწმუნებული ადამიანი. არ ვიცოდი რა მინდოდა მეკეთებინა ცხოვრებაში. თავიდან ვცხოვრობდით დელში, შემდეგ გადავედით მუმბაიში. მე საკმაოდ იზოლირებული ვიყავი მშობლების კარიერისგან. ისინი გაიყარნენ და მე იშვიათად ვხვდებოდი მამას. ასევე იშვიათად ვსტუმრობდი დედას გადასაღებ მოედანზე. ერთი რაც ვიცოდი ის იყო, რომ იდეად მქონდა გავმხდარიყავი კრიკეტისტი. ერთი პერიოდი სკოლის სახელით ვთამაშობდი მაგრამ შემდეგ ამის ინტერესიც დავკარგე და მართლა აღარ ვიცოდი რა უნდა მეკეთებინა ცხოვრებაში.

-ჩვენ ისევ გვახსოვს სიმპათიური ბიჭი "პეპსიდან"...
-ო, ღმერთო! მახსოვს კოლეჯში მივდიოდი და მეგობარი მივიყვანე, რომელიც მონაწილეობდა სინჯებში. იქ ადგილზე მიმიწვიეს მეც. ჩემდა გასაკვირად მის ნაცვლად მე შემომთავაზეს რეკლამა. მე ეს გართობის გამო გავაკეთე.
-და ოფიციალურად როდის გახდით ბოლივუდის მსახიობი?
- მინდოდა ცხოვრებაში გამეკეთებინა უფრო მეტი ვიდრე ცეკვებია, ამ რეკლამის შემდეგ კიდევ გავაკეთე რეკლამები და შემდეგ კლიპი. ამას გარდა აღმოვაჩინე რომ კამერის წინ დგომა სახალისო იყო ჩემთვის და მსიამოვნებდა. ამიტომ მსახიობობა ჩემთვის ბუნებრივი არჩევანი გამოვიდა. კოლეჯში სწავლისას შემომთავაზეს მონაწილეობა ფილმში - "Ishq Vishq ". მე ძალიან აღელვებული ვიყავი მიუხედავად იმისა რომ ვიქნებოდი ნაწილი ფილმისა, რომლის შემადგენლობაში მთელი ანსამბლი იყო და თითოეული უკვე იყო გმირი. მე დაველაპარაკე მშობლებს. ჩემი მშობლები ტელევიზიისა და კინოს მსახიობები არიან. მათ ჰქონდათ თავიანთი არგუმენტები, მაგრამ 16 წლიდან მე საკუთარი შემოსავალი მქონდა და საკუთარ თავზე თავად ვზრუნავდი. ამიტომაც მათ იცოდნენ რომ ნებისმიერ შემთხვევაში მე გავაკეთებდი იმას რაც მინდოდა. მე არ ვიყავი ვარსკვლავების შთამომავალი და ამიტომაც ნებისმიერი შესაძლებლობა რომელიც მოგეცემა უნდა განიხილო და არ გაუშვა ხელიდან. რა გარანტია იყო რომ თუ ამას გავუშვებდი სხვა წინადადება იქნებოდა? ასეც ვუთხარი მშობლებს, მივატოვე კოლეჯი და ოფიციალურად გადავედი ბოლივუდში ბარგით.

-თქვენი მოგონებები ამ ფილმთან დაკავშირებით.
-პირველ რიგში ის რომ ფილმის შუაში მე გამოვეყავი ჯგუფიდან და გადავედი ცენტრში, სასიყვარულო სამკუთხედში. ეს დიდი სიმაღლე იყო, თუმცა მე სკეპტიკურად ვიყავი განწყობილი. შევძლებდი კი ამას? ნებისმიერ მათგანს ჰქონდა უფრო დიდი გამოცდილება ვიდრე მე.
-ვინ არის თქვენი ყველაზე დიდი კონკურენტი? ვის სცემდით ბნელ ადგილას რომ შეხვედროდით, იმის გამო რომ ის თქვენზე უკეთესია?
-ნებისმიერი კონკურენტია, მაგრამ ჩემი ყველაზე დიდი კონკურენტი ვარ მე. ყოველთვის მინდა ვიყო უკეთესი ვიდრე ვარ.
-ვის აფასებთ როგორც მსახიობს?
-ბევრს. მამაჩემი ამ სიის სათავეშია. მე მას ვერც შევადარებ თავს და ძალიან ვნერვიულობ მის ფილმში გადაღებისას.ბ-ნ ბაჩანსა და დილიპს ჰყავთ ჩემი სახით მარადიული თაყვანისმცემელი. მომწონს ამირის სტილი.
ჰოლივუდში ვფიქრობ რომ ალ პაჩინო და რობერტ დენირო განუმეორებლებია, მაგრამ მე აღფრთოვენებული ვარ გზით, რომელიც ტომ კრუზმა და ბრედ პიტმა გაიარეს.

-გაქვთ თუ არა სინანულის გრძნობა რომელიმე ფილმის ან როლის გამო?
-კი, რათქმაუნდა, თუმცა არ დავასახელებ რადგან ვფიქრობ არ ვიქნები მართალი. მე ძალიან ბევრი როლი ვითამაშე, რომლებზეც თუ უკან მოვიხედავ წარსულში, ვნანობ რადგან შემეძლო უფრო კარგი შეფასება მიმეღო. თუმცა ეს ყველაფერი ჩემი, როგორც მსახიობისა და როგორც ადამიანის სასწავლო პროცესის ნაწილია. ნებისმიერს მოსდის შეცდომები თავის კარიერაში და ეს ნორმალური სასწავლო გრაფიკის ნაწილია. ჩემი პირველი ფილმის შემდეგ მე მქონდა წარმატებებიც და წარუმატებლობებიც. ბევრი კარგიც და ცუდიც. ბოლო წლები კი იყო: "ნიშნობა", "როცა ჩვენ შევხვდით ერთმანეთს", "არამზადა" და ბოლოს - "გული გეუბნება ითამაშე".
-ვინ არის თქვენი ყველაზე დიდი კრიტიკი?
-მე თითონ ვარ საკუთარი თავის ტკივილი. ყოველთვის ვუყურებ ჩემს ფილმებს რომ დავინახო რა გავაკეთე და რა შემეძლო გამეკეთებინა უკეთ. და ვგრძნობ რომ სივრცე უფრო დიდი მქონდა... ასე დაუსრულებლად...
-განვაგრძოთ ფილმების თემა... როგორ ირჩევთ ფილმებს?

-მე ვუყურებ ამას აუდიტორიის თვალით. მე ვთანხმდები ფილმზე თუ ვიგრძნობ რომ ისტორიამ დამაინტერესა როგორც მაყურებელი. არა აქვს აზრი იქ მუშაობას თუ არ არის კავშირი მაყურებელთან. თუ არ გრძნობ რომ შენ ხდები იმის ნაწილი რაც ეკრანზე ხდება. ასევე აღარ ვუყურებ ფილმებს კომერციული თვალსაზრისით. თუ ფილმი საინტერესო ჩანს და განსხვავებულია იმისგან რასაც ადრე ვაკეთებდი, აუცილებლად ვცდი.

-როგორ ერთობა შენი ასაკის ვეგეტარიანელი ახალგაზრდა?
-მე ვფიქრობ რომ ცოტა მოსაწყენი ვარ. საღამოებზე თვეში ერთხელ თუ დავდივარ. მართალია მიყვარს ცეკვა, მაგრამ ეს იმდენი მიწევს მუშაობის პროცესშიც რომ ნამდვილად არ მენატრება.
-აბა რა გენატრებათ? -მე მენატრება თუნდაც ერთი შესანიშნავად დაგეგმილი დღე, რომ გადაღებების შემდეგ მთელმა გუნდმა რეჟისორთან ერთად ვისადილოთ სუფთა ჰაერზე. დღე, როცა მე არ ვიფიქრებ სამუშაოზე და პრომოუშენზე. რომ გამოვრთავ ტელეფონს და უბრალოდ მაისურში ჩაცმული ზურგჩანთით წავალ სამოგზაუროდ. მე მიყვარს მოგზაურობა მაგრამ ვერ ვიტან ფრენას. ესაა ჩემი ოცნებების საზღვარი.
-ვინ არის შენი ცხოვრების ამ მომენტში შენს გვერდით? (იგულისხმება გოგონა).
-აჰა, ასეც ვიცოდი რომ ეს კითხვა ახლოს იყო. როგორც უკვე გითხარით მე ძალიან ჩაკეტილი ადამიანი ვარ პირად ცხოვრებასთან დაკავშირებით და ბევრს არავის ვუზიარებ განსაკუთრებით მასობრივი ინფორმაციის საშუალებებს, ამიტომ როცა ჩავთვლი რომ მართლა მაქვს რაიმე სათქმელი მაშინ გეტყვით.
-თუ გოგონას უნდა მოგაწონოს თავი რა უნდა გააკეთოს? -არაფერი. უნდა იყოს ისეთი როგორიცაა. მიყვარს როცა გოგონა დაჯერებულია საკუთარ თავში და არ იყენებს რაიმე არაბუნებრივს თავის საუბარში და მანერებში. მინდა რომ ნაწილობრივ რომანტიკოსი იყოს, ნაწილობრივ თავგადასავლების მოყვარული როგორც მე. შეეძლოს მიჰყვეს დინებას და იყოს მხიარული.
ძალიან მხიარულები და ძალიან რომანტიკოსები მაიძულებენ მათგან შორს, საპირისპირო მხარეს გაქცევას.

-თქვენი ვარსკვლავური ცხოვრების უკან იმალება თუ არა ჩეულებრივი ბიჭი?

-მინდა დაგარწმუნოთ, რომ ბოლივუდი სავსეა ჩეულებრივი ადამიანებით რომლებსაც ენატრებათ ჩვეულებრივი ცხოვრება, რაც ასე გვაკლია. ოჯახთან ერთად თუნდაც ჭიქა ჩაის ან ყავის დალევა საოცრად მეხმარება. ვერთობი მეგობრებთან ერთადაც, მიყვარს მოტოციკლის ტარებაც. კარგია როცა არ გიწევს მუდმივად იმაზე ფიქრი როგორ გამოიყურები, უბრალოდ იყო ის რაც ხარ.
აი, ეს იქნებოდა იდეალური ცხოვრება.

სხვა სტატიები

Related Posts with Thumbnails